O Concello de Boiro vén de enviar un escrito á Consellería de Educación
solicitando que se lle realicen as probas PCR ao persoal de limpeza dos
centros educativos. Todo o persoal docente realizou as probas, pero
excluíronse a outros traballadores/as dos centros educativos como son o
persoal de limpeza e conserxería.
A seguridade de todas as persoas que traballan nos centros de ensino é
fundamental para garantir tamén a seguridade dos estudantes, da comunidade educativa e da cidadanía en xeral do municipio. Tendo en conta a urxencia, xa que as aulas están iniciadas, o Concello de Boiro demanda á administración autonómica que se lle realicen as probas a todo o persoal que traballa nos centros de ensino, tal e como se fixo cos docentes.
A Concellería de Educación traballa no ben de toda a comunidade educativa, colaborando coas demandas e necesidades dos equipos directivos dos centros. Entre outras cousas, dende o Concello dáse resposta a medidas de protección e hixiene dos centros educativos que non son competencia da administración local.
Por este motivo, desde o Concello de Boiro vénselle de solicitar á Xunta de Galicia que se practiquen as probas PCR ao persoal de conserxería e limpeza dos centros educativos o antes posible para evitar poñer en risco ao
alumnado e demais comunidade educativa.
