O Concello de Ribeira informou de que a iniciativa Bonos Concilia CampaRibeira Verán 2020 aínda ten recursos de axuda dispoñíbeis para as familias. De feito, aínda resta unha semana para o remate do prazo de solicitudes de bonos, que finaliza o 10 de agosto.
Até o de agora lévanse adxudicados 48 bonos da modalidade A (destinados a familias en que traballan os dous proxenitores ou o cabeza de familia no caso das monoparentais) dun total de 60 bonos posíbeis cos que sufragar ata a metade do custe mensual do campamento e un máximo de 100 €.
En canto á modalidade B (o resto de familias, cun máximo de 50 euros), entregáronse 13 sobre un tope tamén de 60.
O Concello lembra que empregando estas axudas os cativos con idades entre 3 e 12 anos poderán participar nun dos campamentos ofertados por unha empresa do municipio, cunha duración de cinco horas diarias de luns a venres.
