O Informe Ardán distingue novamente o empuxe innovador de CONGALSA

CONGALSA, firma referente en alimentación con sede no Polígono da Tomada da Pobra do Caramiñal, vén de ser distinguida polo Informe Ardán que elabora cada ano o Consorcio da Zona Franca de Vigo: un informe que pon de manifesto as empresas da nosa terra que máis salientan en excelencia, innovación e competitividade. CONGALSA, recoñecida por Ardán por segundo ano consecutivo, foi destacada en dous dos indicadores de boas prácticas do informe.

En concreto, nas categorías de empresa xeradora de riqueza e empresa innovadora (este último recoñecemento, ademais, obtido por segundo ano consecutivo).

Desde a compañía, en palabras da súa directora de RREE, Isabel Cañas, valóranse estas distincións “moi especialmente”, xa que implican que “nos afanamos por demostrar competencias diferenciais” e por “xerar vantaxes competitivas mediante a implementación dun modo de traballar que tende a lograr a excelencia en todos os nosos índices, parámetros, procedementos e procesos”.

Os indicadores de boas prácticas empresariais do servizo de información empresarial Ardán, dependente do Consorcio da Zona Franca de Vigo, emítense desde o ano 1995. Para cada un dos seus parámetros, o informe está apoiado metodoloxicamente por un grupo de investigación experto no ámbito da competitividade e a xestión empresarial avanzada. Esta liña de traballo do Consorcio Zona Franca de Vigo desenvólvese, ademais, ao abeiro da Cátedra Ardán da Universidade de Vigo e ten como obxectivo identificar e pór en valor a excelencia empresarial galega.

Polo que respecta ao compromiso innovador de CONGALSA, enxalzado por Ardán, a empresa da Pobra do Caramiñal ten entre mans un moi relevante proxecto de transformación, unha iniciativa que desenvolve en colaboración co Centro Tecnolóxico Gradiant e que foi recoñecida recentemente pola Xunta de Galicia, que a seleccionou para a terceira edición do Programa Fábrica Intelixente, cuxo obxectivo radica en favorecer o avance do tecido industrial galego cara un modelo 4.0.