O deputado do PSdeG Martín Seco visitou Noia este venres 21 para demandar que as novas instalacións do Museo do Mar sexan “un verdadeiro reflexo” da importancia da pesca, a navegación e o marisqueo nesta vila e para reprobar “que o Goberno de Santiago Freire rexeite o patrimonio xa recompilado nas antigas instalacións”. Martín Seco emitiu estas declaracións durante a súa xuntanza con Félix González, presidente da Asociación Mar de Noia, cuxo traballo para dotar ao museo de pezas dun gran valor (tales como motores autóctonos, aparellos de pesca, documentos e fotografías) foi encomiado polo deputado. Na reunión tamén estiveron Roberto Iglesias, voceiro do PSdeG en Noia, e Miguel Paz, coordinador comarcal.
Na reunión o parlamentario socialista fixo saber que “foi con Rafael García Guerrero como alcalde cando, en 2011, o concello cedeu á asociación Mar de Noia o uso da antiga raza de abastos para albergar o museo” e que en 2015 “aprobouse destinar 250.000 euros para remodelar o edificio que melloraría esas instalacións”. Martín Seco recoñeceu “non entender o desleixo” do actual alcalde, que, dixo o parlamentario, “nin tan sequera deu acceso ao museo aos representantes da asociación dende que concluíron as obras”. O deputado tamén criticou que “a apertura das novas instalacións para o 21 de agosto sexa cunha exposición externa”e sen convidar a quen impulsaron a posta en valor do patrimonio etnográfico noiés”. Seco demandou que a nova infraestrutura se dedique a ampliar o antigo Museo do Mar e que se volva a idea pola cal se puxo en marcha dende o 2011.
