O Concello de Boiro está a traballar no arranxo do Pavillón Polideportivo da Cachada co obxectivo de ter as instalacións a punto de cara ao arrinque da tempada de voleibol. Segundo informou o Goberno local, a intervención que presenta maior urxencia é a reparación provisional da cuberta do inmóbel para eliminar as filtracións de auga e goteiras da choiva. Á vez estase a traballar sobre o piso de madeira que, nalgunhas zonas, estaba avultado polas filtracións de auga, e no pintado do campo. O Concello lembra que o pavillón acumula dende hai anos “unha serie deficiencias nas que agora se traballa para solucionar coa maior brevidade posíbel”.
Estes traballos que o Concello leva a cabo con fondos propios teñen natureza “provisional”, posto que o Executivo ten previsión de facer a substitución da totalidade da devandita cuberta. Para levar a cabo esta actuación, o Concello de Boiro iniciou contactos con distintas administracións para buscar a colaboración do financiamento e acometer as obras. Na mañá deste martes, sen ir máis lonxe, foron os técnicos da Xunta os que visitaron o pavillón para valorar as reparacións.
De xeito paralelo aos traballos na cuberta, o Concello de Boiro está a traballar con operarios municipais no pintado dos corredores dos vestiarios e paredes do pavillón, habilitando no inmóbel unha sala médica e achegando solucións para aumentar a capacidade da grada.
O Goberno local recorda que as instalacións deportivas da Cachada “xa foron suxeito de diversas actuacións e reformas nos últimos meses”, acometendo traballos como por exemplo a remodelación do ximnasio. Amais, engadiu, está pendente de realizarse a substitución do falso teito da piscina e corredores, que se vai facer con cargo a unha subvención da Deputación da Coruña.