A agrupación SumaRibeira vén de facer público, novamente, o seu rexeitamento á ampliación do orzamento dispoñíbel para o novo Auditorio Municipal, un proceso que implicaría, sostén o grupo, unha importante ampliación do crédito inicialmente acordado. Segundo apunta a asemblea que coordina Xurxo Ferrón, é preciso reabrir o debate sobre un incremento de levaría os 2,5 millóns de euros de partida aos 4 millóns solicitados pola empresa que gañou o concurso. SumaRibeira rexeita este procedemento por “opaco” e por incrementar nun millón e medio de euros o orzamento dispoñíbel. A agrupación opúxose na aprobación en pleno do crédito extraordinario.
Tamén recorda que “logo de moitos esforzos” foi posíbel acceder á memoria do proxecto gañador, que se presentou para a fase final do concurso para a que foran seleccionados tres proxectos, e na que “figuraban expresamente características do proxecto que facían inxustificadas demandas económicas que posteriormente, gañado o concurso, foron solicitadas” explican dende SumaRibeira, que achega un exemplo concreto destas demandas: malia que a empresa estipulaba que o proxecto de 2.500.000 era só para un auditorio, e non apto para representacións teatrais, na memoria do mesmo si figuraban descricións de características propias dun “auditorio dentro de los de gran formato de Galicia”, en palabras de SumaRibeira un sinal inequívoco da idoneidade para as representacións teatrais.
