A plataforma Stop Deshaucios Barbanza vén de expresar a súa satisfacción pola recente decisión do xulgado de primeira instancia en instrución número 2 de Padrón en relación a unha execución hipotecaria promovida polo Banco Santander contra unha familia do concello en situación de risco. Segundo o auto xudicial, varias cláusulas (as relativas ás comisións por reclamación, gastos a cargo da parte prestataria, intereses moratorios, vencemento anticipado do préstamo, etc) incluídas na escritura de constitución do préstamo con garantía hipotecaria “resultaban abusivas”.
A plataforma Stop Deshaucios Barbanza destacou no seu comunicado o feito de que haxa xulgados que “actúen de oficio, como establece o artigo 552 da LEC, para revisar as cláusulas abusivas das escrituras de constitución dos préstamos con garantía hipotecaria e declaren a nulidade das actuacións así como o sobresemento das execucións”.
A entidade que coordinada o ribeirense José Manuel Pena salienta o alivio que recibiu a familia padronesa, que, trala dita resolución xudicial, “pode respirar tranquila porque xa se vía moi próxima a un posíbel desafiuzamento, cando tamén pretendía negociar un aluguer social para seguir residindo na súa vivenda habitual”.
