A Asociación de Empresarios de Ribeira, a raíz da aparición nos medios de informacións relativas aos plans dos concellos da contorna para consolidar ou ampliar os seus polígonos industriais, vén de emitir un novo comunicado no que recorda ás autoridades competentes “a necesidade de que impulsen no municipio ribeirense a creación dunha nova área industrial ou o crecemento da xa existente”. Segundo indican, se antes da pandemia era unha demanda xustificada, agora, coa necesidade urxente de reactivar a economía local, aínda o é máis.
No seu escrito os empresarios de Ribeira din que “cómpre dar a maior celeridade ao proceso de ampliar ou crear o polígono, por termos unha necesidade imperiosa de solo industrial e unhas grandes demandas do mesmo, das que son coñecedoras nas diferentes estancias”. Tamén recoñecen estar sorprendidos do “apoio mostrado por diferentes organismo ás plans para os novos polígonos doutros concellos” mentres do de Ribeira “nin se fala”, conclúen.
