As oficinas de Correos en Galicia abrirán este mércores, día de San Xoán e festivo autonómico para axilizar os trámites do voto por correspondencia con motivo das eleccións do próximo 12 de xullo.
A atención ao público será de 9,00 a 14,30 horas. Os puntos de atención con horario reducido manterán o seu horario habitual durante esta xornada, na que Correos presentará o conxunto de servizos da súa rede de oficinas, ademais das xestións do voto a distancia.
Os votantes poden realizar a súa solicitude de voto para o Parlamento de Galicia nas oficinas postais acudindo persoalmente e tamén de forma telemática na páxina web www.correos.es mediante firma electrónica.
O prazo de solicitude esténdese ata o 2 de xullo. Correos lembra que, segundo a decisión adoptada pola Xunta Electoral Central, o prazo para depositar o voto por correo ampliouse ata o venres, 10 de xullo, no horario habitual das oficinas postais en toda España e, como máximo, ata as 14 horas.
