O Concello de Rianxo adxudicou o proxecto de renovación do alumeado público

O Concello de Rianxo vén de adxudicar á empresa IMESAPI o proxecto de renovación e mellora da eficiencia enerxética do alumeado público. Se ben o orzamento inicial ía alén dos 946.000 euros, ao remate do proceso acordouse executalo por un importe de 757.649 euros. No concurso participou un total de 16 empresas, presentando as súas ofertas.

O proceso, que sei viu adiado polas reclamacións feitas polas firmas excluídas, culminará estes días coa formalización do contrato para o inicio dos traballos. O prazo de execución será de medio ano.

Polo tanto, estímase que co remate de 2020 Rianxo conte con máis da metade das súas luminarias renovadas con LED de baixo consumo. Os traballos levaranse a cabo sobre todo nas parroquias.