O Centro Demostrador TIC (CDTIC) da Axencia para a Modernización Tecnolóxica de Galicia (AMTEGA) prosegue durante o confinamento e o Estado de Alarma coa súa actividade de sesións formativas en streaming. E faino, esta recta inicial de maio, con catro novas xornadas. Organizadas en colaboración con diversos axentes tecnolóxicos, estas sesións en directo vía online diríxense a PEME e autónomos e, co formato #DemosXweb, teñen como obxectivo fomentar o teletraballo ao longo desta etapa de crise sanitaria provocada pola COVID-19.
A programación de maio comezará o día 5 con Inmersos no teletraballo. Estamos a facelo ben?. Seguiralle, o mércores 6, unha sesión sobre ciberseguridade, a cargo do INCIBE. A consultora tecnoloxía Unayta falará, o día 7, sobre a sinatura biométrica; e o 8 unha sesión abordará o funcionamento da plataforma viguesa de comercio en liña DBarrio.
Todas as actividades están programadas en horario de 10.00 a 10.45, son de balde e calquera persoa interesada pode inscribirse para seguilas na web do CDTIC ou a través da aplicación dispoñíbel para plataformas Android e iOS.
Igualmente, calquera provedor tecnolóxico que desexe facer unha sesión para presentar algún dos seus produtos ou servizos pode tomar a iniciativa e solicitarllo ao CDTIC.
Actividades con récord de participación
Desde a entrada en vigor do Estado de Alarma celebráronse catorce actividades que tiveron, en palabras de AMTEGA, “unha grande acollida” e “nas que se bateron récords de seguimento”, pois “duplicouse o número de asistentes respecto ás sesións presenciais feitas con anterioridade”. Así, a cifra de participantes superou os 1.800, o que supón unha media de 134 persoas por sesión.
Ademais, a axencia salienta a “elevada interacción na maioría das sesións”, coa formulación de preguntas polo chat, atendidas no momento, coma nunha sesión presencial, por parte dos relatores. Para quen non puido seguir en directo estes seminarios, na web do CDTIC están dispoñíbeis para a súa visualización.
Temáticas
As temáticas abordadas ata o momento foron variadas, sempre relacionadas con aspectos e ferramentas que poden resultar de interese para PEME e autónomos nestes momentos de crise sanitaria, nas que o confinamento incrementa o teletraballo e a actividade en liña. Así, ciberseguridade e privacidade, comercio electrónico, uso de WhatsApp na empresa, comunicación corporativa, xestión de procesos administrativos en remoto, xestión a distancia de proxectos, videoconferencias, aspectos legais do teletraballo ou mercadotecnia dixital foron algúns dos temas tratados nas sesións retransmitidas no último mes e medio.
