O PSdG de Ribeira aclara que foi responsabilidade da agrupación a proposta de traslado do GAEM

O PSdG de Ribeira vén de emitir unha nota aclaratoria sobre as informacións que reflicten nos medios a aprobación do traslado do GAEM no Concello de Ribeira, o grupo de emerxencias local, que, ante a constatación dos atrancos de operatividade que implica seguir tendo a sede operativa no Consistorio, en plena rúa Rosalía de Castro recentemente peonalizada, pasará a estrear novas dependencias nunha nave alugada en Frións.

A agrupación socialista local lembra que a proposta de traslado veu da súa man, concretamente de Rita Rial, previamente a ser aprobada por unanimidade na corporación municipal. Na nota, o PSdG de Ribeira aclara tamén que se ben a medida do arrendamento foi tomada pola xunta de Goberno local, “é verdade que o traslado do GAEM foi unha proposta do PSOE ao pleno municipal.

E proseguen: “Parécenos moi ben que tanto o alcalde como o concelleiro delegado sexan conscientes da necesidade do traslado, pero insistimos en que a solicitude efectiva para ela, e grazas á cal se produce este traslado, é feita pola concelleira do Grupo Municipal Socialista do PSdeG-PSOE Ribeira”.