O Partido Barbanza Independente (PBBI) vén de presentar, para ser tratada en pleno, unha moción relativa ao programa local de actividades estivais que xorde, en palabras da agrupación, do seu firme compromiso co impulso da hostalaría e o comercio de proximidade de Ribeira. Segundo indica o grupo que lidera Vicente Mariño, o obxectivo da proposta é mellorar na medida do posíbel as oportunidades que ofrece o verán para os ditos sectores no concello, un potencial que “non se está a aproveitar como de debera”, sinala o PBBI, por mor de varios “factores clave”, como son “a competitividade exercida por festas próximas no tempo ou a falta de elementos que sexan quen de atraer máis visitantes á cidade”.
O obxectivo da moción é reverter esta situación, “facendo actividades referentes no noso territorio coa finalidade de que máis xente da redonda veña coñecer o concello, promovendo a nosa hostalería e o noso pequeno comercio e así como dar motivos para visitar os nosos recursos naturais”. Por este motivo, agrupación propón o desenvolvemento dun “Carnaval de Verán” os días 10, 11 e 12 de xullo, coa colaboración do Concello de Ribeira como “ente canalizador e promotor da actividade dotándoa dos recursos necesarios”. A iniciativa, ademais, asentaríase nunha estreita cooperación do Executivo local coas asociacións locais e co pequeno comercio, “dándolle á iniciativa un maior percorrido e un meirande calado na sociedade”.
