Continúan os roubos nos establecementos ribeirenses, pois os amigos do alleo actuaron na madrugada do martes no bar Bahía, situado no Malecón. Para acceder ao local, o intruso rompeu unha cristaleira. O botín resultou ser a máquina comecartos, levándose consigo toda a recadación que contiña.
Un novo suceso que fai que volva a apoderarse a intranquilidade entre os comerciantes e hostaleiros da cidade. En xaneiro do presente ano, a Asociación de Empresarios de Ribeira presentou un escrito na Subdelegación do Goberno na Coruña, expoñendo a súa preocupación pola vaga de roubos e reclamando o incremento de efectivos na Comisaría da Policía Nacional.