A Asociación de Empresarios de Ribeira vén de recibir resposta ao escrito remitido á Subdelegación do Goberno na Coruña co fin de trasladar á representación provincial do Goberno a fonda preocupación do colectivo local pola vaga de roubos que asola o concello dende hai meses, unha lacra, sinalaban no comunicado, que se ceba nos establecementos da cidade de calquera sector e “ante a que nos sentimos indefensos”. Na misiva a asociación reclamaba ao Goberno central o incremento de efectivos na Comisaría de Policía Nacional co fin de combater o dito problema de inseguridade. Na resposta, a Subdelegación trasládalle á asociación ribeirense o compromiso do actual Goberno “por desenvolver na meirande brevidade posíbel as axeitadas políticas que permitan a progresiva incorporación de persoal para as Forzas e Corpos de Seguridade do Estado”.
A Subdelegación, por outra banda, recoñece que “nos últimos anos produciuse unha diminución no número de funcionarios” adscritos ás ditas forzas e a outros “servizos fundamentais”, como é o do ensino. Segundo engade na misiva, “é unha situación herdada por este Goberno que, porén, ten a decidida determinación de emendar esta problemática”. Neste senso, a Subdelegación lembra que en 2018 foi convocada “a maior oferta de emprego público da última década”, consistente en case 31.000 prazas, das que 7.688 estaban destinadas a docentes ás ditas forzas e corpos de seguridade.
Este incremento de funcionarios, se ben quedou en punto morto dende 2018, volve estar no punto de mira do actual Goberno, que ten, en palabras da Subdelegación, “o forte compromiso de facer medrar a dotación de efectivos policiais en todos os núcleos do ámbito estatal e, por suposto, na Comisaría de Ribeira”. Isto levarase a cabo unha vez rematen os “necesarios períodos de selección e formación dos futuros axentes”, explica a Subdelegación, que tamén se compromete, na resposta á petición do empresariado de Ribeira, a equipar a cidade con infraestruturas precisas para o desenvolvemento axeitado das funcións dos axentes, “tal e como quedou de manifesto na recente formalización do contrato para a construción da nova comisaría”.
