Este xoves 6 de febreiro recala en Boiro a mostra itinerante As Pegadas do Camiño de Santiago do Barbanza. A Orixe, impulsada pola asociación Amigos do Camiño de Santiago do Barbanza e comisariada por Antonio Gongález Millán, membro da entidade. A apertura oficial da exposición celebrarase ás 20.00 horas na Casa da Cultura Ramón Martínez López, onde se poderá visitar ata o 26 de xaneiro.
Segundo lembra o Concello de Boiro, a exhibición reflicte, por medio das fotografías tomadas por Adolfo Enríquez Calo, as evidencias históricas da ruta xacobea entre Corrubedo e Santiago de Compostela.
Nun plano máis concreto, a exposición plasma en imaxes a recuperación do camiño terrestre que vai desde Ribeira a Santiago, “un traballo de varios anos para poñer en valor as pegadas da tradición xacobea no Barbanza”, en palabras da devandita asociación.
A exposición itinerante que agora chega a Boiro inaugurouse en Ribeira, estivo na A Pobra do Caramiñal e pasará tamén polas localidades de Rianxo, Dodro e Padrón. Está enmarcada no programa O Teu Xacobeo, promovido pola Consellería de Cultura e Turismo da Xunta de Galicia.
Na inauguración deste xoves intervirán o alcalde de Boiro, José Ramón Romero, o presidente da asociación, Manuel Mariño Nin e o comisario da mostra, Antonio González Millán.
