A Casa Consistorial de Ribeira será o primeiro destino dunha exposición itinerante que, baixo o título As pegadas do Camiño de Santiago no Barbanza: A Orixe, reflicte por medio de fotografías as evidencias históricas da ruta xacobea entre Corrubedo e Santiago, itinerario cuxa presentación en sociedade está prevista para hoxe á tarde na Capela Real do Hostal dos Reis Católicos.
A mostra, organizada pola Asociación do Camiño de Santiago do Barbanza A Orixe e comisariada por Antonio González Millán, inaugurarase o sábado 21, ás 13.00 horas, podendo visitarse ata o 6 de xaneiro.
A recuperación do camiño terrestre que transita polos municipios de Ribeira, A Pobra do Caramiñal, Boiro, Rianxo, Dodro, Padrón e desde Iria Flavia ata Santiago, é o resultado de dous anos de traballo coa fin de facer aflorar e poñer en valor as pegadas da tradición xacobea nas terras do Barbanza.
