O sector hostaleiro de Rianxo e o Concello seguen a xuntar forzas en materia de promoción turística e gastronómica. E fano achegando aos internautas a súa guía de receitas da gastronomía local, unha exhaustiva escolma culinaria que recolle algunhas das mellores e máis auténticas maneiras de preparar os produtos que chegan ao porto rianxeiro, cuxa primeira edición data de outubro de 2016.
A guía Rianxo cociña o mar é unha publicación de case un centenar de páxinas feita coas destacadas contribucións dos hostaleiros do concello que tamén achega unha xanela de renovación, acubillando un feixe de creacións que dan unha viraxe á tradición e que, en palabras do Concello, “teñen a capacidade de reinterpretar a elaboración dos produtos locais”.
A guía de receitas está xa dispoñíbel na Rede, en formato PDF, para quen queira descargala. Inclúe receitas tradicionais dos hostaleiros e, a partir da páxina 34, receitas dos cociñeiros profesionais. Complétase, como dixemos, cun capítulo adicado á innovación culinaria (a partir da páxina 48), coa guía de locais participantes, coas biografías dos cociñeiros participantes e cun capítulo adicado aos recunchos do mar rianxeiro.
