Rianxo encara un xaneiro ateigado de homenaxes a Castelao

17 Xaneiro 2020

Este ano 2020 que vén de comezar conmemórase o 70 cabodano do falecemento de Alfonso Daniel Rodríguez Castelao, o célebre escritor, debuxante, intelectual e político rianxeiro que, coas súas contribucións artísticas, ideolóxicas e solidarias, exemplificou e simbolizou as arelas de xustiza, progreso e identidade máis comúns e estendidas de todas as galegas e galegos. Para celebrar este aniversario e seguir lembrándolle ao mundo a vixencia do seu discurso e do seu legado, o Concello de Rianxo organizou un completo programa de actividades: os Actos Castelao 2020 en homenaxe ao ilustre rianxeiro.

As propostas comezaron o 20 de decembro coa apertura da exposición Sempre en Galiza: homenaxe de artistas galegos, que estará habilitada no Auditorio até o 1 de febreiro. Trátase dunha escolma de obras destacadas cedidas polo Museo do Gravado e Estampa Dixital de Artes, en Ribeira. A colectiva é un conxunto de salientábeis contribucións pasadas e presentes ás homenaxes a Castelao, da autoría de grandes artistas contemporáneos da nosa terra, todas e todos con recoñecidas e influentes traxectorias de prestixio: Antonio Murado, Berta Cáccamo, Antón Patiño, Menchu Lamas, Xosé Freixanes, Correa Corredoira, Manuel Moldes, Vidal Souto, Quintana Martelo, Alfonso Costa, Manuel Facal, Silverio Rivas, Alberto Datas, Felipe Criado. Virxilio e Leopoldo Nóvoa.

De maneira paralela, o venres 24 de xaneiro recalará na Biblioteca pública, ás 20.30 horas, unha cita artística que, baixo o título A+A, integra a presentación dun audio-caderno e unha performance da man de Ricardo de Barreiro. Os interesados en asistir deberán inscribirse a través do enderezo electrónico biblioteca@concelloderianxo.gal.

Ao día seguinte, sábado 25, a Sala Arcos Moldes do Auditorio será escenario, ás 20.00 horas, da estrea da curtametraxe O Castelo da Lúa, de Vou Films. O evento incluirá mesa redonda a cargo do director e guionista Lois Basallo, as historiadoras da arte Adriana Rego e Vanesa Mariño, sumándose a participación especial dos actores Sergio Pazos e Miguel Pernas. Así mesmo, proxectaranse outras dúas curtas da referida produtora: As lavandeiras e As costureiras.

Máis tarde, o venres 31, a Sala Arcos Moldes do Auditorio volverá converterse no lugar escolleito para o desenvolvemento dunha nova actividade. Nesta ocasión, presentarase o número 151 de A Voz de Barbantia e a novela Escribirme, de Héctor Pose Porto e editada por Toxosoutos. Comezará ás 20.30 horas e contará coa intervención artística do pintor e gravador Manuel Ayaso. A apertura e o peche musical correrá a cargo do cuarteto de frautas Leliñas, da EMR.

Iniciando o mes de febreiro, o sábado 1, os actos concentraranse en varios emprazamentos. En primeiro lugar, ás 12.00 horas, o busto de Castelao e as rúas de Rianxo vivirán a ofrenda floral, intervención das autoridades e saída dun roteiro. Xa pola tarde, ás 20.00 horas, o salón de actos do Auditorio acollerá a presentación do libro Desvelando a Ademar Escambia, editado por Toxosoutos e co que José Carou Rey gañou a décimo oitava edición do certame literario Antón Avilés de Taramancos. Tamén asistirán o escritor Agustín Agra; Clodio González Pérez, de Editorial Toxosoutos; e o alcalde de Rianxo, Adolfo Muíños.

Outros artigos

Publicidade

Revista en papel

Opinión

“Hacia la España federal”. Xosé Perozo

“Hacia la España federal”. Xosé Perozo

Si se cumplen las predicciones demoscópicas, el próximo domingo EH Bildu ganará las elecciones en el País Vasco, superando por primera vez al PNV en escaños y en votos. El fenómeno de crecimiento abertzale está rasgando las vestiduras de muchos politólogos y...