Este venres 20 de decembro a sala de exposición do Auditorio de Rianxo vai acoller a inauguración dunha mostra que toca moi preto á historia e á cultura da vila, por ser unha proposta que conmemora a figura de Alfonso Daniel Rodríguez Castelao e que abre o programa de celebracións do autor e político rianxeiro no ano que está a piques de comezar. Trátase da exposición de gravados Sempre en Galiza: homenaxe de artistas galegos Actos Castelao 2020.
O acto de apertura está previsto para as 19.00 horas e xa confirmaron a súa presenza o alcalde de Rianxo, Adolfo Muíños, o alcalde de Ribeira e presidente da Fundación Museo de Artes, Manuel Ruíz, o vicepresidente desta entidade artística e cultural, Javier Expósito, e o director da mesma, Xoán Pastor Rodríguez, que é, tamén, o comisario da mostra. Esta poderá visitarse dende o 20 de decembro ao 2 de febreiro na dita sala do Auditorio de Rianxo.
A colectiva é un conxunto de salientábeis contribucións pasadas e presentes ás homenaxes a Castelao, da autoría de grandes artistas contemporáneos da nosa terra, todas e todos con recoñecidas e influentes traxectorias de prestixio: Antonio Murado, Berta Cáccamo, Antón Patiño, Menchu Lamas, Xosé Freixanes, Correa Corredoira, Manuel Moldes, Vidal Souto, Quintana Martelo, Alfonso Costa, Manuel Facal, Silverio Rivas, Alberto Datas, Felipe Criado. Virxilio e Leopoldo Nóvoa.
