Na tarde deste xoves 23, a Mancomunidade de Municipios Arousa Norte, acompañada da Asociación Amigos do Camiño de Santiago do Barbanza. A Orixe, presentou na Feira Internacional de Turismo de Madrid (FITUR) a historia do percorrido terrestre da ruta marítima Traslatio.
Antes de dar paso ao vídeo que narra este acompañamento a pé da Ruta Xacobea do Mar de Arousa e río Ulla, a coordinadora técnica da entidade supramunicipal, Irene Maneiro, relatou a historia deste camiño milenario, manifestando que “somos un destino vivo e moi dinámico onde a tan solo 30 minutos de Santiago atópase o mar polo que entrou aquela embarcación máxica, este camiño é por tanto un encontro entre o peregrino contemporáneo e o viaxeiro do século XXI.”
Seguidamente, os presentes puideron coñecer a través dunha proxección audiovisual a historia do camiño terrestre que acompaña á referida ruta, así como os símbolos de interese da tradición Xacobea.
O presidente da Mancomunidade de Municipios Arousa Norte e alcalde de Ribeira, Manuel Ruiz, encargouse de pechar o acto apuntando que “A Orixe, así bautizamos ao noso camiño, é o resultado de horas de traballo e investigación de moitas persoas e entidades, entre as que se atopan a Asociación de Amigos do Camiño de Santiago do Barbanza que hoxe nos acompañan. Este traballo e a constante motivación por reivindicar que Arousa Norte está na Orixe da tradición Xacobeo é o que marcamos como o noso destino. Un destino que ten moito que ofrecer.”
Entre os asistentes a esta presentación figuraban os rexedores da Pobra do Caramiñal, Xosé Lois Piñeiro; Boiro, José Ramón Romero; e Rianxo, Adolfo Muíños; ademais de Antonio González e Manuel Mariño, en representación da Asociación Amigos do Camiño de Santiago do Barbanza. A Orixe.
Arousa Norte permanecerá na referida feira ata a súa conclusión, tendo presenza e visibilidade no stand de Turismo de Galicia, promocionando o xeodestino da comarca do Barbanza como unha alternativa de turismo sostible.