Rianxo acolleu esta segunda fin de semana de xaneiro unha das moitas actividades de homenaxe que programou o Concello ao abeiro do programa Actos Castelao 2020 para render tributo ao seu ilustre veciño, o histórico escritor e político Alfonso Daniel Rodríguez Castelao. No acto conmemorativo deste domingo participaron o alcalde rianxeiro, Adolfo Muíños, e máis a portavoz nacional do Bloque Nacionalista Galego, Ana Pontón, quen reivindicou a actualidade do pensamento do escritor rianxeiro nestes tempos actuais, “un pensamento que resulta incómodo para o poder” e que está na base do que debera ser “o cambio político real en Galiza”. Pola súa banda, o rexedor local lembrou que “tras 70 anos do pasamento de Castelao, no exilio o seu legado político e artístico continúa vixente”. Ademais, dixo, é considerado o “rianxeiro máis universal”.
Pontón aproveitou a homenaxe para estender o recoñecemento á xeración da que a autor de Cousas formaba parte: unha xeración que “loitou por construír un proxecto nacionalista do que o BNG é herdeiro”, e na que se inseriron mulleres silenciadas como María Miramontes, Amparo López Jeán, “condenadas ao exilio”, mulleres aldraxadas como Coralia e Maruxa Fandiño, ou Virxinia Pereira Renda, que “loitou durante 20 anos por recuperar a obra de Castelao espoliada polo fascismo”.
A portavoz nacionalista tamén tivo palabras para mostrar a postura do seu partido ante a presentación do novo Goberno do Estado: “Durante a campaña dixemos que os votos do BNG servirían para defender os intereses dos galegos e galega e o resultado está á vista: un acordo de investidura que é a mellor noticia para Galiza nos últimos dez anos”.
Respecto das vindeiras eleccións autonómicas, Pontón dixo que a nosa terra “precisa dun cambio político e o BNG vai liderar ese cambio. É necesario un proxecto pensado dende Galiza, autocentrado e inclusivo, sen complexos e confiando en todo o potencial e capacidade para defender os sectores produtivos, empresas, servizos públicos e a clase traballadora porque podemos conquistar un futuro mellor sen pedir permiso a ninguén”, recalcou.
Pontón rematou a súa intervención parafraseando a Castelao: “O verdadeiro heroísmo consiste en transformar os anceios en feitos, as ideas en realidades”.
Pola súa banda, o rexedor de Rianxo lembrou que “recentemente”, cun volume do Sempre en Galiza tomou posesión no Congreso o deputado do BNG Néstor Rego “que segue a estela dos Castelao, de Suárez Picallo, Otero Pedrayo ou Vilar Ponte, primeiros deputados na República e aos que debemos os primeiros pasos para outro goberno”. Muíños recordou o roteiro previo ás intervencións políticas ante o busto de Castelao, do que salientou “a súa defensa e compromiso ético con Galiza e noso idioma”. Para o alcalde de Rianxo, o deputado do BNG no Congreso, Néstor Rego terá “unha tarefa primordial”, poñer en riba da mesa a “axenda galega petada despois de anos de silencio de deputados e deputadas que exerceron de procesión dos caladiños”.
