O ano 2020 comeza con importantes novidades literarias e algunhas nos collen moi de preto. Por exemplo as máis recentes novelas do palmeirán Manuel Gago Mariño e do limiao afincado en terras boirenses Antón Riveiro Coello. O primeiro, que ten ás súas costas varias novelas que foron auténticos éxitos editoriais (como por exemplo o libro de aventuras O exército de fume, ambientado na Segunda Guerra Mundial coa nosa terra como escenario dos acontecementos) ten entre mans unha das novidades máis agardadas do ano que comeza: Nus, que será editado novamente polo selo Xerais a longo deste primeiro treito de 2020.
Polo que respecta á nova contribución literaria de Riveiro Coello, a novela As liñas do paraíso, foi a gañadora (xunto con Crónica denigrante de Álex Alonso) da nova edición do Premio Torrente Ballester de narrativa en galego que concede cada ano a Deputación da Coruña. O libro aborda argumentalmente a problemática e o drama das persoas refuxiadas, reflectindo, en concreto, as viaxes e as vidas de persoas que teñen de fuxir de dous escenarios concretos: Siria e Europa. O fallo do xurado do dito premio salientou a súa capacidade para ofrecer ao lector unha diagnose certeira da “realidade multicultural de Europa” e para crear e dar vida, tamén, a un personaxe inesquecíbel: o neno Karim, que carrexa sobre os seus ombreiros un drama que nos atinxe a todas e todos.
