Despois da súa estancia no municipio boirense durante o verán, Ana e Karina, dúas nenas ucraínas, regresaron para desfrutar das vacación de Nadal. A concelleira de Política Social, Marisa Collazo, recibiunas esta mañá no Concello para desexarlles un feliz ano e facerlles entrega duns agasallos.
Ambas rapazas chegaron a Boiro desde Ucraína o 20 de decembro, prolongándose a súa estadía ata o 22 de xaneiro. Así, teñen a oportunidade de festexar esta época dunha maneira moi distinta á que acostuman no seu país de orixe.
As dúas foron acollidas pola mesma familia que xa o fixera no estío. Karina, de 15 anos, procede dun fogar de sete irmáns e Ana, de 9 anos, vive nun orfanato en Ucraína. Ademais, ambas proveñen de zonas afectadas pola radiación da catástrofe nuclear de Chernóbil. Os estudos médicos estiman que o tempo que pasan en España, con bo clima e boa alimentación, aumenta considerablemente a súa esperanza de vida.
