20190828. O Concello de Boiro despediu onte a dúas nenas ucraínas que estiveron no 0municipio pasando as vacacións de verán a través da ONG ‘Niños de Ucrania y Andalucía’ encargada da tramitación en España para cativos internados en orfanatos.
Karina e Ana, de 15 e 9 anos, chegaron a Boiro no mes de xuño procedentes de Ucraína para pasar no municipio os tres meses de verán. As dúas foron acollidas por unha mesma familia. Karina procede dun fogar de sete irmáns e Ana vive nun orfanato en Ucraína. Ademais, ambas proceden de zonas afectadas pola radiación da catástrofe nuclear de Chernóbil. Os estudos médicos estiman que os dous meses que pasan en España, con bo clima e boa alimentación, aumenta a esperanza de vida, como mínimo de dous anos nos menores.
A familia de acollida de Karina e Ana expresa o seu agradecemento a tódalas entidades que colaboran con elas e lles prestan servizo, “estamos moi agradecidos con todos os que nos mostran o seu apoio para darlle o mellor a estas nenas no tempo que están aquí, como a clínica dental Gonzalo López Castro.” Deste xeito, a nai de acollida recorda que “son nenas que viven en moi malas condicións no seu país e o mínimo que lle das aquí agradéceno moito.”
O alcalde de Boiro, José Ramón Romero, e a concelleira de Política Social, Marisa Collazo, despediron onte a estas dúas nenas no Consistorio e obsequiáronas cuns agasallos para que leven na súa viaxe de volta a Ucraína. Debido ao contentas que estiveron durante a súa estancia, teñen ganas de volver na época do Nadal.
