Esta longa finde que deixamos atrás as olladas dos naturalistas, dos investigadores científicos e dos integrantes dos equipos locais de emerxencias e rescate dirixíronse novamente á ría de Arousa, por mor dunha nova situación de posíbel varamento masivo de cetáceos. A voz de alarma veu amplificada na véspera de Reis pola Coordinadora para o Estudo dos Mamíferos Mariños (CEMMA), que se fixo eco da presenza de diferentes mandas de golfiños comúns en perigo de encallar no litoral da ría e, tamén, na contorna do esteiro do río Ulla, entre. A situación foi moi semellante á rexistrada este verán, no que tamén se albiscaron grupos destes mamíferos mariños desorientados e, con toda probabilidade, separados dunha manda central á entrada da ría.
Desta volta, todo apunta a que se volveu repetir a mesma circunstancia. Os diferentes exemplares de golfiños comúns (segundo indica CEMMA, raros de ver dentro das nosas rías) foron dar ao porto de Vilagarcía (dous golfiños), outros dous a Neixón, en Boiro (onde se axudou a pór en liberdade ao exemplar máis novo pero non se puido facer nada polo adulto), un quinto ás canles de Catoira (onde foi finalmente rescatado, non sen certa dificultade) e un sexto á dársena de Pontecesures, río Ulla arriba (que ao longo do día de Reis tentaba ser devolto ao mar sen que se tiveran noticias sobre o éxito das tarefas). Segundo advertiu a coordinadora CEMMA, é moi probábel que ao longo destes días sexan atopados novos exemplares de cetáceos en risco de encallamento. Por este motivo, e debido á brevidade das horas de sol (ás 18.30 horas é case de noite) e á importancia de actuar con rapidez para evitar a morte dos animais, a organización pediu a colaboración cidadá para que se comunique nos teléfonos 686989008 ou 112 a localización de novos cetáceos. O CEMMA agradeceu a intervención das persoas, autoridades e integrantes dos grupos locais de Protección Civil e Bombeiros que tramitaron as alertas e participaron nos distintos operativos.