Numerosas actividades desenvolveranse no municipio boirense ao longo da fin de semana. Baixo o nome Fantasía, o venres 27, a partir das 18.00 horas, dous desfiles percorrerán a rúa Principal e rúa peonil con música. Ademais, celebrarase Re-Encontros da man dos colectivos Unión de Muchachas, A. C. Arghallada e Da Ria Luv. Esta cita consiste nun día de actividades centradas na rúa Principal. Deste xeito, a partir das 12.00 horas, haberá un mercadiño de segunda man no local das Muchachas; concertos no Da Ria Luv, a partir das 19.00 horas; e actuación no local Leñaverde do Centro Social, a partir das 21.00 horas.
Na xornada do sábado 28 terá lugar no pavillón da Cachada, ás 18.00 horas, o Festival de Patinaxe a cargo do Club de Patinaxe de Boiro. Pouco despois, ás 18.30 horas, a Casa da Cultura Ramón Martínez López será escenario do Festival de Nadal da Asociación Cultural Abeloura. Mentres tanto, ás 19.15 horas, a Carpa dos Soños, situada na praza do Concello, albergará Riscando o ceo, un circo que aparece en forma de humor, maxia, risco, malabares, acrobacias e equilibrios imposibles. Inspirado no mundo do Principiño, o ton absurdo e reflexivo fai que nos reformulemos o esencial das cousas.
E o domingo 29, ás 17.30 horas, o pavillón da Cachada acollerá o Festival de Nadal da Asociación Cultural Pedra da Aroña de Escarabote.
