Con motivo da conclusión das obras de humanización e instalación dunha plataforma única nun tramo da rúa Rosalía de Castro, en Ribeira, acábase de reabrir ao tráfico rodado esta vía na zona que estivo afectada pola actuación.
Neste senso, os condutores que, empregando esta vía, queiran dirixirse cara Cristóbal Colón poden facelo subindo pola rúa de Lugo, na cal tamén se colocou plataforma única; mentres que aqueles que queiran conectar co resto de rúas que parten da praza do Concello -Mariño de Riveira ou Pérez Galdós, entre outras- deben circular pola parte traseira do Consistorio.
Desde o Concello manifestan que este cambio en relación á situación anterior á execución das obras débese á necesidade de agardar a que se asente apropiadamente a parte pavimentada con lousas de granito na zona que conecta co tramo peonil de Rosalía de Castro, na contorna da antiga Sanyg, que non aconsella transitar de momento por ela con vehículos motorizados. Por outra banda, a nova disposición tamén servirá para avaliar o comportamento do tráfico con esta alternativa circulatoria.