A Plataforma Stop Desahucios Barbanza vén de retomar a negociación co Banco Santander ante unha execución hipotecaria iniciada pola citada entidade, tramitándose no Xulgado de Instrución Número 2 de Ribeira, para que unha familia do municipio ribeirense poida continuar na súa vivenda habitual, situada no lugar de Fondevila, a través dun aluguer social. Segundo a plataforma, trátase dun fogar composto por varios membros e con ingresos que non superan o salario mínimo interprofesional.
Por outra banda, a plataforma expresa o seu agradecemento a CaixaBank, “por estar case sempre ao lado das familias humildes”, colaborando e axudando actualmente a unha familia de Vilagarcía de Arousa para poder renovar o contrato de aluguer social da vivenda habitual.
Así mesmo, Stop Desahucios lembra que xa pasaron aproximadamente dous anos desde a última reunión mantida coa anterior conselleira de Vivenda e o director do Instituto Galego de Vivenda e Solo (IGVS), manifestando que “seguimos agardando que se adopten medidas reais sobre as vivendas baleiras en poder dos bancos, fondos buitre e a Sareb para poñelas a disposición das familias con escasos recursos, máxime na actualidade en onde cada vez hai máis impagos da renda por alugueiro.”
