O Bloque ribeirense interpuxo unha denuncia na comisaría da policía para que se investigue o roubo de diverso material informativo empregado na campaña electoral e que foi subtraído dos soportes nos que estaban instalados.
O responsable de comunicación e concelleiro, Luís Pérez Barral, declarou que “decidimos interpoñer unha denuncia por ser unha cantidade considerábel de material que pagamos cos nosos recursos e coas achegas da militancia.” Segundo Pérez Barral, non é a primeira vez que se producen este tipo de situacións, “mais esta vez non imos ficar parados porque levaron material dunha rúa, dunha praza e de toda unha parroquia, é demasiado.”
O edil opina que este roubo responde “á carraxe que algunha xente intolerante ten contra o nacionalismo galego, nomeadamente o BNG, cuestión acrecentada polo auxe da extrema dereita.” Incluso manifesta que “partidos como o PP contribúen a branquear unha forza xenófoba, racista, machista e antigalega que promove discursos de odio.”
Desde o Bloque afirman que accións coma as acontecidas atentan contra os valores democráticos e de convivencia que sempre demostrou o pobo galego, polo que a formación amosa a súa repulsa ante estes “feitos intolerantes”, concluíndo que “non van amedrentarnos, nin van conseguir paralizar a actividade do Bloque.”