A Fiscalía e a acusación particular expuxeron na sesión do xuízo desenvolvido ao longo desta xornada as súas conclusións definitivas e piden para José Enrique Abuín prisión permanente revisable. Defenden que Abuín raptou a Diana Quer na Pobra do Caramiñal, levouna ata Asados para violala e matouna para non ter que pagar as consecuencias dunha agresión sexual. Ademais, negan que a morte de Diana fose accidental e dan por probado que o acusado a asasinou na nave cunha brida. Así mesmo, afirman que é un “depredador sexual”, que non se arrepinte dos seus feitos.
O avogado da acusación particular, Ricardo Pérez Lama, manifestou que “pretende facerlles crer de verdade que non agrediu sexualmente a Diana e iso, señoras e señores do xurado, non o cre absolutamente ninguén. Se alguén quere desfacerse dun corpo, e máis cando está morto, primeiro non o mete no seu coche nos asentos de atrás para que calquera o poida ver. Non, non. O que fai é inmediatamente desfacerse do cadáver. Pero el vai ao sitio que coñece e vai a toda velocidade porque Diana vai viva no coche.”
Pola súa banda, a fiscal Cristina Margalet expresou que “bateulle na caluga, privouna da súa liberdade de movementos, privouna do móbil, a súa única posibilidade de defensa e o único medio que tiña para pedir axuda. Pero, por que? Porque isto forma parte do seu modus operandi, precisamente para deixala indefensa e á súa vontade. E, para que? Pois porque tiña por obxecto violala e despois asasinala, e logo, esconder o seu corpo para que non fose atopado.”
A defensa presentará as súas conclusións o martes, aínda que xa recoñeceu un posible homicidio doloso, e non involuntario, que subiría a petición de pena para o acusado a entre 5 e 7 anos de prisión, e non os 2 e medio que se solicitaron nun primeiro momento.
