A agrupación Boiro Novo que coordina Dores Torrado quere que o concello suba un extra en accesibilidade. En termos máis concretos, o grupo vén de presentar unha petición para que se destine un 10% do Plan de Obras e Servizos (POS) a ceibar o termo municipal e as infraestruturas de atrancos e barreiras diversas para a mobilidade da cidadanía.
Esta porcentaxe de investimento, sinalan, deberá poñer o foco nas contornas dos colexios, nos centros sociais e en calquera lugar con especial afluencia de xente. “Cremos que é preciso que se afronte con perspectiva a longo prazo o obxectivo de ter un concello plenamente accesíbel”, sinalan.
A agrupación tamén propón que as medidas non se limiten a achegas puntuais, senón que sexa un plan de continuidade até derrubar a meirande cantidade de atrancos no termo municipal.
Boiro Novo lembra tamén que non se trata da primeira vez que a asemblea local propón esta medida: “É unha petición recorrente que lle vimos facendo ano tras ano nas pasadas lexislaturas ao Partido Popular sen obter resposta algunha”. Para rematar, recordan que un dos puntos acordados para votar a favor da investidura do novo Goberno “foi a creación dun plan de mobilidade sustentábel dialogado con todos os grupos da Corporación”.
