Coincidindo coa ponte do 1 de novembro e os días de lecer xerados pola festividade, a Biblioteca Municipal de Boiro incorporou novos volumes aos seus fondos poñendo o foco na rapazada. Trátase dunha máis que destacada escolma de libros infantís entre os que se atopa a colección enteira dunha das sagas máis seguidas polas nosas nenas e nenos: a saga de Super Pataca, o particular superheroe saído da imaxinación de Artur Laperla, e creado (na ficción) ironicamente polo seu contrincante principal, o doutor Malévolo, responsábel dunha máquina que é de converter en tubérculos todo canto se pon seu alcance, mesmo ao protagonista orixinariamente humano da saga.
As aventuras de Super Pataca chegan á Bibioteca de Boiro coa cifra nada desprezábel de sete aventuras, todas elas editadas por Mamut e todas dispoñíbeis en galego. A escolma de novidades complétase con (entre outras contribucións) A despensa máxica de Begoña Oro, La isla de Abel de William Steig ou Os gritos das Illas Lobeiras, dun dos nosos grandes autores da literatura infantil e xuvenil: Antón Cortizas.
