20191018 O Concello de Boiro adheriuse a pasada primavera ao programa de compostaxe doméstica que promove a sociedade galega SOGAMA, que ten como finalidade impulsar a vida útil e sustentábel dos refugallos orgánicos que as familias xeran nos seus fogares. En virtude desta iniciativa, a empresa pública entregou ao Concello de Boiro 30 composteiros o pasado mes de xuño para seren distribuídos noutras tantas vivendas locais con xardíns, hortas ou terras de cultivo de seu nos que xestionar e aplicar o compost resultante da súa xestión alternativa de residuos orgánicos. Segundo confirmou hoxe o Goberno local, os composteiros van ser repartidos en diversos domicilios do termo municipal.
Tamén fixo saber que se está previsto realizar un curso inicial de formación para o uso dos mesmos ás persoas que se apuntaron para participar nesta iniciativa e que van ter un recipiente específico de lixo orgánico nas súas casas. A entrega dos composteiros e o curso de formación levarase a cabo o vindeiro luns, 21 de outubro, ás 19:00 horas no centro social de Abanqueiro.
Obxectivos
O obxectivo non é outro que promover a recuperación da materia orgánica en orixe. Os fogares participantes recibiran formación e máis contedores específicos construídos con material reciclado con capacidade para acubillar entre 345 e 400 litros.
Esta iniciativa de SOGAMA a prol da compostaxe doméstica achega, en palabras da sociedade autonómica medio-ambiental, importantes beneficios: “Ao darlle unha segunda vida á materia orgánica na propia vivenda, que supón en torno ao 42% da composición dunha bolsa de lixo tipo, evítase o seu depósito no contedor verde convencional, propiciando que se minore tamén a entrega de lixo a SOGAMA para o seu tratamento final”.