Boiro recibe de SOGAMA trinta contedores para compostaxe doméstica

06 Xuño 2019

A celebración do Día Mundial do Medio Ambiente, este 5 de xuño, serviu para dotar de especial protagonismo as pequenas-grandes cousas que os cidadáns podemos facer para contrarrestar a destrución do planeta. A diferenza doutras efemérides, a celebración de onte puxo de relevo a relevancia do activismo doméstico: os xestos sustentábeis e responsábeis a pé de cociña e a pé de horta. Por exemplo, os xestos relacionados co tratamento rendíbel e ecolóxico dos refugallos. Neste senso, Boiro apuntouse un tanto a finais de maio, sumándose ao programa de compostaxe doméstica de SOGAMA.

En virtude desta iniciativa, a empresa pública entregou ao Concello 30 composteiros para seren distribuídas noutras tantas vivendas locais con xardíns, hortas ou terras de cultivo de seu nos que xestionar e aplicar o compost resultante da súa xestión alternativa de residuos orgánicos. 

O obxectivo non é outro que promover a recuperación da materia orgánica en orixe. Os fogares participantes recibiran en datas vindeiras un curso de formación presencial impartido por técnicos de SOGAMA, aproveitado logo para o reparto dos equipamentos onde aloxar os refugallos: contedores específicos construídos con material reciclado con capacidade para acubillar entre 345 e 400 litros.

Esta iniciativa de SOGAMA a prol da compostaxe doméstica achega, en palabras da sociedade autonómica medio-ambiental, importantes beneficios: “Ao darlle unha segunda vida á materia orgánica na propia vivenda, que supón en torno ao 42% da composición dunha bolsa de lixo tipo, evítase o seu depósito no contedor verde convencional, propiciando que se minore tamén a entrega de lixo a SOGAMA para  o seu tratamento final”.

A empresa pública tamén explica que as persoas interesadas teñen á súa disposición unha páxina web específica www.sogama.gal, na que atoparán toda a información sobre a compostaxe  doméstica e ata recursos de apoio tales como vídeos e xogos. Á devandita páxina cómpre engadir outra complementaria: www.compostaconsogama.gal. A día de hoxe, SOGAMA xa repartiu máis de 10.300 composteiros entre preto de 300 entidades (concellos, centros educativos e colectivos sociais).

Outros artigos

Publicidade

Revista en papel

Opinión

“Meus irmáns” – Xulio Xiz

“Meus irmáns” – Xulio Xiz

Fóronse meus dous irmáns: Mato, o maior, e Santi, o pequeno. O maior, morreume hai unhas semanas. O máis novo, o día do Pai. Se Xesús tivo vida longa e froitífera, Santi foise moi cedo despois de poñer unha pica en Bristol. Os tres somos tamén agora irmáns en terra:...