20191016. A terceira edición da Andaina Solidaria contra o cancro de mama terá lugar, o domingo 20, en Boiro para recadar fondos destinados á loita contra esta enfermidade. Esta cita, organizada por Cimadevila Salud coa colaboración do Concello e outras entidades locais, supera xa os 2.900 inscritos procedentes do municipio boirense e doutros lugares da contorna.
O punto de partida sitúase na praza do Concello, ás 10.30 horas. A continuación, procederase á realización do itinerario de 11 quilómetros que percorrerá a rúa Principal, Igrexa, A Boliña, San -dirección á praia de Mañóns-, Triñáns, O Saltiño, o paseo marítimo de Barraña, estuario do río Coroño e Goiáns para regresar novamente ao emprazamento de saída.
Así mesmo, disporase dunha alternativa sinalizada para aquelas persoas que non se vexan capaces de completar a totalidade do treito. Así, desde O Seán poderase ir directamente á rotonda da Pedra da Bouza, acurtando tres quilómetros. Do mesmo xeito, desde o paseo marítimo posibilitarase chegar á praza do Concello pola Avellaneda.
O único corte de tráfico producirase no momento do inicio da andaina, desviando o tráfico, primeiramente, da rúa Principal e, despois, da avenida da Constitución para que os participantes crucen en dirección A Boliña. Durante o resto do traxecto, realizaranse cortes puntuais nos cruces.
Co obxectivo de garantir a seguridade, disporase duns 40 voluntarios por parte da organización, axentes da Policía Local e membros de Protección Civil con dous coches equipados con desfibriladores, así como unha ambulancia medicalizada para atender calquera incidencia.
Ademais, non se aprazará a realización deste evento por mal tempo, exceptuando que a Dirección Xeral de Emerxencias así o recomende.
