20191004. A segunda edición da BTT Terras de Barbantia chega a Boiro o 13 de outubro cun itinerario de 42 quilómetros que percorrerá a serra do Barbanza. A saída terá lugar ás 09.30 horas desde a avenida de Compostela, emprazamento que tamén exercerá de liña de meta a partir das 13.00 horas para, unha vez cheguen tódolos participantes, proceder ao sorteo dos agasallos. Así o deron a coñecer o alcalde de Boiro, José Ramón Romero; o concelleiro de Deportes, Marcos Fajardo; a directora de relacións institucionais de Jealsa, Margarita Hermo; e o presidente de Barbantia Roda, Manolo Gómez.
Como representante da organización da proba, Manolo Gómez explicou que a dificultade desta cita “é media en tódolos sentidos, en esforzo e mais en técnica”, polo que se incorporarán alternativas de subida para quen non se vexa capaz de seguir a ruta marcada. Tamén quixo expresar o seu agradecemento ao Concello, Jealsa e a tódolos voluntarios que tomarán parte dese día.
Margarita Hermo quixo animar a todas aquelas persoas que non participen a achegarse para coñecer “unha parte do noso concello que paga a pena ver.” Con respecto ao patrocinio de Jealsa, manifestou que “estamos encantados, como é habitual, en colaborar coas entidades deportivas.” De feito, precisou que dentro do seu programa de responsabilidade social corporativa We Sea, “unha das patas importantes é a colaboración social” entendéndoa como “proxectar os nosos valores a outros eidos da sociedade, neste caso, o deporte.” Así mesmo, engadiu que esta cita “ten unha importancia non só a nivel deportivo, senón tamén a nivel sentimental, porque Barbantia Roda naceu con traballadores de Jealsa que tiveron a iniciativa de poñer en marcha un club deportivo, naquel momento, centrado na bicicleta.”
Pola súa parte, o edil Marcos Fajardo sinalou a cantidade de eventos deportivos que se celebran no municipio e convidou á xente a participar nesta proba para a cal, “se fixo unha xunta de seguridade” co propósito de evitar incidentes.
Na súa intervención, o rexedor José Ramón Romero quixo agradecer a organización por parte de Barbantia Roda e a colaboración de distintas empresas. Ademais, desexou que se trate “dunha proba para o desfrute dos participantes, un día lúdico e que poidamos saborear a comarca.” Do mesmo xeito, engadiu “espero que sigamos nesta liña, que se consoliden todas estas probas”, sen esquecer o traballo do Departamento de Deportes que “está apoiando todas estas iniciativas e traballando arreo coas asociacións e entidades deportivas.”
Os interesados dispoñen ata o 10 de outubro para inscribirse a través da páxina web www.emesports.com, pagando un prezo establecido nos 7 euros. Polo de momento, hai 50 persoas anotadas, agardando superar os 200 participantes do pasado ano.
