20190919 Este sábado 21 vai ser en Ribeira un sábado de conto. E serao da man de Os Quinquilláns Teatro, que ofrece no Centro Cultural Lustres Rivas o espectáculo-obradoiro A fábula do espantallo, un relato participativo para nenas e nenos con entrada libre e de balde. A cita será ás 12.00 horas, organizada polo Concello, a Xunta e a Deputación ao abeiro do programa de dinamización da lectura Ler Conta Moito.
A obra A fábula do espantallo é un taller teatro inspirado nun dos libros infantís máis queridos pola rapazada das pasadas décadas: O espantallo amigo, do escritor de Vila de Cruces, Xosé Neira Vilas. Poderán participar as persoas adultas e a rapazada que asista, xa que o obxectivo do grupo teatral é que “se mergullen” ao máximo no espectáculo. Esta actividade está orientada para nenas e nenos a partir dos 5 anos de idade e as súas familias.
Como lembraremos, O espantallo amigo conta a historia do tío Ramón de Reborneda, que ten a sorte de contar co mellor figueira da aldea. Porén, a sorte trúncase cando os merlos deciden visitala e facer algo que máis dar voltas arredor dela. Por esta razón, o tío fai un espantallo para escorrentar os paxaros e disuadilos de achegarse á súa árbore. Con todo, o espantallo resulta ter máis ganas de facer amigos que de escorrentar merlos.
O elenco dos Quinquilláns para esta representación está formado por Tero Rodríguez e Lucho Penabade.