20190708. Como é tradicional, nesta segunda fin de semana de agosto a parroquia de Corrubedo vai celebrar as súas festas de verán. Unha festividade na que este ano o Concello de Ribeira vai implicarse de forma máis participativa no seu calendario do que é habitual ata o punto de encargarse da organización dos eventos lúdicos correspondentes ao sábado.
A cita foi presentada hoxe no consistorio pola concelleira de Cultura, María Sampedro; Abdón Santos, en representación da entidade Kurrala Rock; Antonio Freire, presidente da asociación Corrubedo XI Séculos; e José Francisco Parente Martínez, un colaborador que se involucrou activamente para poder sacar adiante este cartel.
Así, as festas comezarán o venres 9, ás 12.00 horas, coa Misa solemne na honra da Virxe do Perpetuo Socorro para dar paso a continuación a un grupo de actividades promovidas polo Kurrala Rock. Trátase do chamado ‘Día das Peñas’ no que, segundo informou Abdón Santos, xa están inscritos preto de 300 participantes e que constará de xogos populares coma tira de corda, carreiras de sacos, etcétera. Ademais, estará amenizado pola charanga Mil9, mentres que pola noite terá lugar o debut da rapeira Decora, de 16 anos de idade; e as actuacións do grupo Chocolate con Churros e da orquestra ribeirense Platinum. Pechará a xornada a Discomóvil Chocolate.
O sábado 10 arrancará coa Misa solemne na honra da Virxe do Cabo. De 16.00 a 19.00 horas, haberá unha sesión de paddle surf e kayak na praia do porto por cortesía da escola local Grip Surf School. Pola noite e a iniciativa do Concello tocará o grupo Lume coa actuación estelar de Miguel Torres, moi prezado pola xente maior que debutou en 1962 e formou parte de elencos como as orquestras Poceiro e Compostela. Pensando na xente moza, concluirase coa actuación de Planet Discomóvil con DJ Kiber.
Por último, a asociación Corrubedo XI Séculos será a encargada xunto coa parroquia de organizar a tradicional misa solemne do domingo 11 na honra da Virxe do Carme, patroa dos mariñeiros. A liturxia do mediodía estará cantada polo Coro de Corrubedo. A continuación sacaranse as imaxes en procesión ata o porto co acompañamento dos grupos Xiada e As Silvaveiras e haberá unha ofrenda floral aos mortos no mar. Ao regresar á Igrexa rematarase coa entoación da Salve Mariñeira.