20190808. A partir de mañá, o municipio boirense converterase nun fervedoiro cultural pois non só comezará o Mercado Castrexo. Así, a praza do centro social de Boiro trocará en escenario a partir das 12.00 horas para Só, o espectáculo de Pistacatro Productora de Soños. O protagonista é obsesivo, cuadriculado e meticuloso. Un ser único na súa especie rodeado de numerosas caixas que escapan ao seu control e coas que xoga para dar forma ao seu mundo. Deste xeito, do caos xurde un universo delirante de risa, creando unha loucura cómica e transformándose nun novo ser cunha nova figura. Se chove, trasládase á Casa da Cultura.
Por outra banda, Escarabote celebrará durante dous días a Fin de Semana Tradicional que comezará mañá 9 co serán tradicional, a partir das 20.30 horas, coas actuacións de A Dorniña de Abanqueiro, Aínda é Sedo, Aixola, Arrancadeira, As da Canteira, As Xeiteiras, Aula de Gaita e Percusión Tradicional da A.N.P.A. do C.E.I.P. Escarabote, Bailadela, Nunca é Tarde, Os Caraveiros, Teixedal, Gaiteiros e Pandereteirxs Aroña, entre outros. Tamén haberá mexillóns, churrasco, sorteos e máis sorpresas. Ademais, o sábado 10 terá lugar o XXXI Festival Folclórico de Escarabote. Ás 20.00 horas, empezarán os pasarrúas con saída desde o Pontellón para, ás 20.30 horas, dar paso ao festival que contará coa Asociación Cultural Folklórica Andrés Laguna de Segovia, coa Escola de Baile e Pandeireta Caramiñas da Pobra do Caramiñal e coa Asociación Cultural Pedra de Aroña de Escarabote. Se chove, trasládase á Casa da Cultura de Boiro.
Así mesmo, cómpre sinalar que o espectáculo Dona Barriga Verde a cargo de Larraitz Urruzola previsto para hoxe na praia de Barraña, ás 20.00 horas, aprázase para o 22 de agosto por mor do mal tempo.
