20190807. Unha nova edición do Mercado Castrexo chega a Boiro esta fin de semana. O Campamento Castrexo, postos de alimentación, artesanía, música e animación nas rúas son só unha pequena mostra de todo o que ofrecerá esta cita. Ademais, desenvolverase un obradoiro de cestaría e outro de cerámica para os máis pequenos. Incluso os namorados se poderán casar polo rito castrexo. O mercado estará aberto o venres 9 desde as 17.00 ata as 00.00 horas, mentres que o sábado 10 e o domingo 11 terá lugar en horario partido de 11.00 a 15.00 horas e de 18.00 a 00.00 horas.
Á presentación celebrada esta mañá no Concello acudiu Anxo Fernández, responsable de Xema Comunicación, empresa encargada de realizar este festexo e que explicou as actividades e espectáculos que se van realizar no mercado.
A concelleira de Cultura, María Outerial, aproveitou tamén para facer un convite a visitar Boiro esta fin de semana, xa que “ademais do Mercado Castrexo, nestes días coinciden outras actividades culturais e deportivas.”
Pola súa parte, o alcalde boirense, José Ramón Romero, expresou o seu agradecemento a Xema Comunicación e tamén a tódalas persoas que colaboran para facer que o Mercado Castrexo de Boiro se consolide e atraia máis visitantes. De feito, afirmou que esta celebración “ten atractivo para persoas de todas as idades xa que conta con actividades para os mais cativos, postos de artesanía e comida e exhibicións coas que pasar a fin de semana.”
