Xa hai cartel e confirmación na web das feiras medievais: o Mercado Castrexo de Boiro celebrarase este ano entre o días 9 e 11 de agosto, enchendo novamente as rúas da vila de artesanía, xogos e comida tradicional: os elementos que tradicionalmente identificamos coa vida nos emprazamentos barbanzáns de Neixón (Boiro), Baroña (Porto do Son) ou o Castro da Cidá (Ribeira), que serían, por proximidade e número de construcións que se conservan, os principais referentes da celebración.
O Mercado, organizado por XeMA Comunicación en colaboración co Concello, tamén dará acollida a un campamento castrexo, ruadas musicais, espectáculos de artificio e a celebración de xogos tradicionais, e mesmo servirá de escenario privilexiado para recuperar un xeito alternativo de formalizar un casamento: as vodas celtas. Calcúlase que as rúas peonís de Boiro contarán cun centenar de artesáns.
