Bealo estará de celebración a partir deste venres

28 Agosto 2019

20190828. Tal e como anunciamos esta semana en O Barbanza, a partir deste venres comezan as festas de San Ramón de Bealo e, con tal motivo, o Concello de Boiro acolleu hoxe a súa presentación. Ao acto asistiron o alcalde, José Ramón Romero; a concelleira de Turismo, Marisa Collazo; a directora do CIM, María Ortega; e Pablo Lorenzo, representante da comisión de festas.

Lorenzo afirmou que “como cada ano os actos relixiosos teñen un gran protagonismo e as misas da novena de San Ramón comezaron xa o día 22. O día 30 darán comezo os festexos coa subida dos santos dende a Igrexa parroquial ata San Ramón.” Xa pola noite agárdase gran afluencia de xente, especialmente de mocidade que acude á verbena e acampa nas inmediacións da ermida. O sábado 31, día propio de San Ramón, haberá misas e actuacións musicais que amenizarán a xornada.

Ademais, este ano incorpóranse algunhas novidades coma, por exemplo, a hora sen ruído que se vai fixar entre as 19.00 e as 20.00 horas do día 31 co obxectivo de que os cativos con autismo poidan gozar tamén destes festexos. A concelleira de Turismo e Servizos Sociais, Marisa Collazo, manifestou que “é unha medida coa que non chegamos a tempo nas festas do verán pero que queremos impulsar a partir de agora para concienciar e facer uns festexos inclusivos no municipio.”

Tamén se instalará un Punto Violeta para contribuír a unhas celebracións libres de agresións machistas. O espazo estará situado nas inmediacións do campo da festa e estará atendido por persoal especializado, levándose a cabo as funcións de asesoramento e información, así como a atención a posibles vítimas. Neste senso, a directora do CIM, María Ortega, indicou que “o que se pretende con esta iniciativa é fomentar o ocio sen medo e tamén prestar asistencia no caso de que sexa necesaria.”

Pola súa parte o rexedor boirense, José Ramón Romero, mostrouse satisfeito polo traballo realizado, tanto pola comisión coma desde Turismo, por seguir desenvolvendo esta celebración que é “unha das máis importantes para os veciños de Boiro, que nunca perden a súa cita anual no San Ramón, o que fai que a romaría teña máis de 250 anos de historia.”

Outros artigos

Publicidade

Revista en papel

Opinión

“Oporto”. Alberto Barciela

“Oporto”. Alberto Barciela

Oporto puede seguirse en el sentido serpenteante de un río, o en la vertical de un océano, ascenderse o descenderse por meandros encajados en calles que a veces semejan acantilados, que siempre se precipitan hacia agua, una urbe universal cerca del tiempo que le tocó...