20190717 Non te molles, usa chuvasqueiro. Este é o lema da campaña lanzada pola Asociación Renacer de Ribeira en colaboración co Concello e a Cofradía da Dorna para os festexos dorneiros que están a piques de comezar (a partir deste 18 de xullo, e en formato explosivo e intensivo). A campaña a prol do sexo seguro, consentido, con sentidiño, e saudábel, incluirá a distribución de máis de 3.000 preservativos no transcurso dos festexos.
“Agora que vai arrancar a LXXI Singladura da Festa da Dorna”, explican dende Renacer, “non te esquezas de levar o teu chuvasqueiro no peto, bolso, mochila, faldriqueira ou onde che pete, pero lévao”.
As actividades deste xoves
Respecto do programa do día 18, a xornada inaugural, as actividades comezarán sobre as 18.30 no parque García Bayón, a carón da Galeguiña, onde os locais co distintivo de Profesional Dorneiro oficiarán de inauguradores (rompedores de cintas institucionais). Logo será a quenda dos decibelios, co concerto de De Vacas ás 21.15 horas no escenario do sol, o percorrido do Facho Dorneiro a partir das 22.35 horas e Seremonia de Inisiasión ás 23.00 horas, na porta do Sol. O programa da primeira xornada complétase coa macroqueimada dorneira ás 23.20 horas e o concerto de Sés ás 23.40 horas, tamén no escenario do Sol.