20190715 Axóuxere, o proxecto editorial rianxeiro, vén de dar a coñecer os nomes das vindeiras ocupantes da súa Residencia de Escritoras/es, o fogar-obradoiro que a editorial impulsa cada ano dende a aldea de Brión (Rianxo). Segundo fixo saber, trátase de María Ovelar, Marina García López, Henrique Yuichi Komatsu, Joelle Saliba e Raquel Ferrández. O traballo de Marina García López ten o engadido extra de poñer o foco nun ilustre creador local: Castelao.
Este ano confirmouse a gráfica ascendente da residencia dende o punto de vista cuantitativo e, tamén, cualitativo: chegaron propostas dende unha manchea de países e unha boa parte delas salientaban pola súa calidade e polo interese xerado. “Resultounos moi difícil facer unha escolma que, de maneira inevitábel, implicou deixar fóra moitos destes magníficos proxectos”, recoñeceron os membros do comité, integrado pola Deputación da Coruña, o Concello de Rianxo e a propia editorial rianxeira. Finalmente, o pasado 10 de xullo e logo dunha “longa deliberación”, elixíronse os devanditos cinco escritores: cinco talentos para medrar e abrir novos horizontes durante agosto e decembro deste ano.
· María Ovelar (Madrid), salienta por un proxecto narrativo que pretende explorar os límites da novela posmoderna e o carácter metaliterario da escrita, inserido nun contexto cultural contemporáneo entendido como gran palimpsesto. O comité valorou moi positivamente “a súa proposta na estela de Borges que procura a obra infinita, circular, de múltiples e posíbeis lecturas”.
· Marina García López (Galiza) foi elixida para participar polo interese dun proxecto de seu que estuda a influencia do traballo artístico de Alfonso Daniel Rodríguez Castelao e Eduardo Dieste no rumbo das artes gráficas riopratenses cara á modernidade. “Especialmente interesante tamén a revalorización da pouco coñecida figura de Eduardo Dieste”, destacou o comité.
· Henrique Yuichi Komatsu(Brasil), por un proxecto de escrita poscontemporánea, na liña de autores como Lydia Davis, Donald Barthelme ou Pierre Bettencourt, que camiña nas marxes do expresábel, transitando a borda na que a linguaxe tenta falar do tecido do real, “con toda a súa imprecisión e borrosidade”, en palabras do comité.
· Joelle Saliba (Francia/Líbano), polo intento de escribir, desde a distancia e o exilio, a través de fragmentos autobiográficos, sobre o lugar perdido da súa nenez, o suburbio de Karantina, en Beirut, onde tivo lugar unha masacre durante a guerra civil de 1975. O comité enxalzou o seu “exercicio de escrita que conversa coa memoria histórica”.
· Raquel Ferrández (Galiza), polo proxecto de investigación e tradución sánscrito-galego do Spandakārikā (Estrofas da vibración) de Vasugupta (s. ix d.C.), obra clásica do shivaísmo tántrico de Caxemira. O comité salientou o baleiro que vén a encher a obra da escritora: a ausencia na nosa contorna de estudos filosóficos que dialoguen coa milenaria tradición oriental de indagación e coñecemento.
