20190709. A tempada alta de Cruceiros en Ribeira despídese este sábado coa celebración da XIII Regata Gadis, unha cita á que concorrerán tódalas principais Divisións do ORC (Regata, Regata/Cruceiro e Cruceiro) e cunha participación estimada en preto da vintena de embarcacións.
No acto de presentación estiveron o presidente do Club Náutico Deportivo ribeirense, José Luís Torres Colomer; o Comodoro, José Luís Lomba; o Delegado da Área de Santiago de Gadis, Román Roo Álvarez; e, o Delegado de Gadis en Ribeira, Luís Vázquez.
Torres Colomer indicou que “cada clase terá tres premios, que é o noso símbolo do Náutico, o cabaliño de mar de bronce.” Así, repartiranse un total de nove premios, mentres que “Gadis daralle ao patrón ou armador de cada barco unha fermosa zamarra para ir ben equipado no mar cando o precisen.”
Lomba precisou que para esta regata teñen un percorrido establecido, “normalmente o máis largo que temos”, pero que foi necesario deseñar outros itinerarios alternativos “polas condición metereolóxicas que temos para este sábado de ventos variables de compoñente sur, polo que a previsión non é moi fiable ao tratarse dunha borrasca.” Deste xeito, hai un total de 12 rutas planificadas que se elixirán na reunión de patróns que se realizará unha hora antes de iniciarse a regata, todas elas de trazado costeiro a excepción dun barlovento-sotavento, é dicir, un circuíto entre boias de tan só 6 millas se o vento fose de escasa intensidade. Ademais, todos eles ofrecen unha distancia que de media sitúase preto das 12 millas, uns 22 quilómetros.
Roo Álvarez falou en nome de Gadis, manifestando que “a nosa colaboración con eventos deportivos destas características supón unha das bases do noso programa básico de responsabilidade social corporativa e unha mostra máis do apoio na sociedade na que operamos.” Tamén puntualizou que “ao longo deste exercicio pasado, do 2018, levamos a cabo máis de 2.100 colaboracións, das cales case o 40% estiveron relacionadas con hábitos saudables e deporte.”
Tras a celebración da Ramiro Carregal Rey, da que o club de Ribeira é colaborador co Real de Portosín, seguíronlle a Regata Frinsa e a Regata Congalsa, sendo a Regata Gadis o broche de ouro da tempada, á cal asistiron os veleiros máis destacados de toda a flota da comarca, así como de outras rías coma a de Vigo, Pontevedra e A Coruña.
A ría de Arousa convértese así, unha vez máis, nun atractivo marítimo que poderá ser navegada en plenitude e en toda a súa extensión, pasando por A Pobra, Boiro ou Rianxo.
A saída está prevista ás 14.00 horas deste sábado desde inmediacións do Náutico de Ribeira, partindo de maneira gradual e cunha diferencia de cinco minutos, primeiro os Regata, a continuación os Regata/Cruceiro e por último os Cruceiro. A entrega de premios celebrarase ás 18.00 horas.
