20190620. O alcalde de Ribeira, Manuel Ruiz Rivas, contactou xa con varias agrupacións políticas presentes na corporación municipal co obxectivo de falar sobre a organización durante a próxima lexislatura. Ruiz valorou que a situación se está desenvolvendo, ata o de agora, “segundo o esperado e o guión que publicamente manifestaron os grupos.” De feito, sinalou que o PBBI nega todo tipo de diálogo e só quere estar presente nas reunións con outros portavoces. Respecto das demais formacións, expresou que “están abertos a intereses puntuais á hora de estudar os presupostos e outro tipo de cuestións nas que poidan ter plantexamentos diferentes ao noso, é dicir, a que se vexan representadas nesas contas as inquietudes propias.” Tamén aclarou que “teñen unha canle de diálogo aberta e permanente co goberno que lle permite coñecer as nosas posturas e acercar as súas, ou que nós nos acerquemos ás deles.” Así mesmo, precisou que contactará con tódalas forzas, incluída Suma Ribeira, porque “é o que fixen sempre” para ver cales son as súas inquedanzas e preocupacións ao consideralos “importantes cualitativamente.”
Pola súa parte, Vicente Mariño de Bricio, do PBBI, manifestou que recibiu a chamada do rexedor ribeirense mais que “a proposta que queiran facer desde o goberno, desde Alcaldía, escóitoa pero en xunta de portavoces, con todos xuntos.” Do mesmo xeito, descartou chegar a apoios de mandato cos populares e que, simplemente, “eu vouno apoiar no que vexa correcto do que sexa beneficioso para Ribeira e para as súas parroquias.” Polo tanto, indicou que se Ruiz quere facer algunha proposta, “que a faga nunha xunta de portavoces e escóitoa con tódolos grupos en conxunto”, así como que “terá que buscar os apoios nos que indirectamente o apoiaron o sábado.”
Xosé Vázquez Cobas, do BNG, explicou que tiveron onte un primeiro contacto cos populares e descartaron entrar no goberno porque “é algo que non se contempla pola nosa parte de ningunha das maneiras.” Ademais, negáronse a un pacto de lexislatura para darlle estabilidade ao goberno, xa que “nós estamos dispostos a falar e negociar con tódolos grupos políticos en cousas concretas que afecten ao benestar da cidadanía.” Cobas tamén explicou que apoiará a tódalas forzas en casos concretos “con aquelas cousas coas que nós esteamos de acordo e que vaian a mellorar a vida dos cidadáns de Ribeira.”
Xurxo Ferrón, de Suma Ribeira, declarou que, polo de agora, non recibiron ningún tipo de chamada, pero que, no caso de producirse, “nós iremos a falar e nalgunhas cousas concretas teremos que reflexionar sobre elas ou ver se temos tempo de facer unha contraproposta”, sempre e cando a asemblea non decida o contrario. Ferrón quixo recordar que “a postura que temos desde o principio, así fixemos antes da proclamación do alcalde, é acudir a tódalas reunións para dialogar, para falar, cando se nos convide a ir.” Mentres tanto, atópanse á espera.
Finalmente, José Manuel Vilas, do PSdeG-PSOE, sinalou que “o máis probable é que nos reunamos mañá” e trasladaranlle o contido da xuntanza aos órganos executivos do seu partido.
