20190626. A comisión encargada de organizar as Festas da Guadalupe recupera unha idea xurdida nos anos 90. Nos festexos celebrado en 1991, o cartel que anunciaba dita cita fora seleccionado nun concurso de debuxo entre os colexios de Rianxo. E este ano fan o mesmo, enviando aos centros de infantil e primaria, no mes de maio, as bases para participar. Ademais, poden presentar as súas obras os pequenos do concello rianxeiro que estuden fóra.
Nas bases do concurso figura que o formato e tamaño dos traballos é libre, sempre que sexa adecuado para reproducir nun póster tamaño A2. O mesmo sucede coa temática, mais a valoración terá en conta que se adecúe ao contido, que non é outro que a divulgación das Festas da Guadalupe 2019. Así mesmo, os debuxos poden incluír texto informativo que anuncie, por exemplo, a data de celebración. Tamén é importante que as obras estean identificadas na parte posterior cos nomes e idades dos autores, así como o centro escolar no que cursan os seus estudos e, se son traballos da aula, identificaranse co curso, aula e centro. Cómpre sinalar que os traballos que se entreguen desde un centro de ensino levan implícita a aceptación das bases e a autorización do seu uso, mentres que os debuxos entregados por outras vías requiren unha autorización expresa dos proxenitores ou titores legais do menor. A obra elixida recibirá un premio de 100 euros que se poderá gastar en libros ou material escolar nas librarías Casa Cándido, Libraría BEN e Estanco Xacobiño, as cales colaboran coas festas. No caso de ser un traballo grupal dunha clase, o vale entregarase á titoría correspondente para o uso conxunto do alumnado. E os traballos non gañadores poderán ser expostos ao público ou nas redes sociais.
Se algún cativo quere probar sorte aínda dispón de dous días, pois o prazo remata o 28 de xuño. Para máis información e descargar a autorización, poden visitar a páxina de Facebook da comisión ou a través do enderezo electrónico festas@festasdagudalupe.gal. A entrega de debuxos e permiso de xeito individual farase no Audiotorio.