O tenente alcalde e concelleiro de cultura de Outes, Anxo Núñez Fernández, presentou este mércores 24 de xaneiro o programa de actividades de Entroido no concello. Segundo avanzou, dende o Consistorio repartiranse o vindeiro mércores 14 de febreiro ate 2.970€ en premios. Será a través do concurso de disfraces. O programa de actividades inclúe o Desfile de Entroido, o Enterro da Sardiña e unha chocolatada con música a cargo da charanga Os Jalácticos.
Nestas datas Outes tamén contará con programación para as familias con obradoiros de carautas e accesorios, pintacaras, globoflexia, inchábeis, minidiscos e outras actividades infantís na festa do entroido para os cativos. “Queremos convidar a veciños e visitantes a desfrutar do noso Entroido”, sinalou o concelleiro, lembrando que podemos consultar toda a programación e información para o concurso na páxina web do concello.
Axenda
-7 e 9 de febreiro – Obradoiro de carautas e accesorios do Entroido.
De 17:30 a 19:00 horas na Casa da Cultura
Para nenos e nenas de entre 5 e 10 anos. Máximo 6 prazas, por orde de inscrición. Reservar praza chamando á Casa da Cultura (teléfono: 981 850 950).
-10 de febreiro – Festa de Entroido para os cativos.
Ás 17:30 horas no Pavillón da Serra de Outes
Obradoiros de pintacaras, tatuaxes e globoflexia. Inchables grandes, minidisco, photocall e ás 19:00 horas o espectáculo Bailando de Animarte.
-14 de febreiro – Enterro da Sardiña e Concurso de Disfraces e desfile polas rúas da Serra.
No concurso repartiranse ate 2.970 € entre os mellores disfraces nas categorías de infantil, individual, grupos e comparsas.
A cualificación do xurado será no Pavillón Polideportivo da Serra ás 17:00 horas.
Para inscribirnos no concurso haberá que enviar o formulario debidamente cuberto ao correo electrónico animacion@outes.gal, no rexistro dixital ou no presencial do concello ata o luns 12 de febreiro ou, presencialmente o mesmo día do concurso antes das 16:30 h, no polideportivo da Serra.
Ao remate terá lugar o Desfile de Entroido amenizado pola charanga os Jalácticos, con saída na praza de Galicia e remate na praza do Bosque, onde se queimará a Sardiña, farase a entrega de premios e terá lugar a chocolatada. En caso de chuvia suspenderase o desfile.
