O Concello de Boiro vai organizar un acto, o vindeiro venres, para render homenaxe aos deportistas máis destacados do ano 2023 nas distintas modalidades deportivas que se practican no municipio. Para a selección dos galardoados solicitouse información a todos os clubs deportivos e deportistas individuais do municipio, informaron fontes do Consistorio, concretamente a Área de Deportes, impulsora do evento.
Deste xeito, a Gala do Deporte de Boiro vai destinada a “recoñecer publicamente os mellores resultados deportivos acadados polos deportistas do municipio no ano 2023 ou tempada 2022/2023”. Este, sinalou o concelleiro Marcos Fajardo, “é simbólico e de recoñecemento ao esforzo que deportistas e clubs do noso municipio realizan de xeito diario”.
Coo dixemos, co obxectivo de recadar a maior información posíbel solicitouse información a todos os clubs do municipio para poder valorar os méritos en cada modalidade. A título individual ou colectivo valorarase ter acadado podio en campionatos galegos, como mínimo un 6º posto en campionatos de España, ata un 10º posto en campionatos europeos e ata un 20º posto en campionatos do mundo.
A título de club será recoñecido conseguir un ascenso de categoría, resultar gañador na correspondente competición ou ter acadado como mínimo un terceiro posto nun Campionato Galego ou un 6º nun campionato de España da modalidade deportiva que sexa.
A Gala do Deporte 2023 do Concello de Boiro terá lugar o vindeiro venres 19 de xaneiro de 2024 ás 20.00 horas na Casa da Cultura de Boiro.
